災難過後

DSC_0237一年前,香港發生過回歸後最嚴重嘅海難。
一年後,除左無咗煙花表演,其他野都如平常一樣。

入左隊咁耐,真係冇諗過香港會發生呢 D 事。當時當緊煙生更,有人係 Whatsapp 到講南丫島附近有舢舨撞船,跌左百幾人落海。當時仲諗住件事係虛構居多,舢舨點會坐到百幾人呀,香港又唔係第三世界…

之後睇落都好似歌舞昇平,煙花照放,電視照播,好似咩事都冇。個時真係唔信,不過好奇令我不時都 refresh 下各新聞網站,但係咩野都搵唔到。

煙花完左之後,終於有即時新聞見到係咩事故。一見到幅相就心感不妙,成架船已經沉左落去,好多黑影 (人?) 係海上面漂浮。書上面學嘅災難,真係發生左。

之後電台嘅氣氛開始緊張,隊員一批批咁俾人揀去海怡,幫手接消防救左上岸嘅傷者。雖然好彩最後未被選中,不過聽其他隊友的憶述,當時環境真係非常震撼,恐慌、失去知覺嘅大有人在。

眨下眼就一年,除左坐船多左段錄音,同埋今年冇左煙花之外,其他野都一如以往了。

發表迴響

你的電子郵件位址並不會被公開。 必要欄位標記為 *