每逄冬天，大棠的楓葉都會轉成紅色，吸引大量遊人上山觀賞。

其實未買機票之前，真係唔知道馬來西亞有地方叫沙巴，而沙巴首府係亞庇。一聽仲以為係一 D 好落後嘅地方，聽都未聽過。落到機之後，發現其實沙巴真係一個好靚的地方。

第二次坐廉價航空，今次的體驗真係唔錯，好過上一次好多。上次坐廉航個位真係好狹窄，頂住隻腳又郁唔到，真係坐得幾辛苦。今次雖然架機舊 D ，而且唔係咁乾淨，不過張椅子就真係幾舒服，同大陸 D 正價航空公司差唔多。佢同其他航空公司唔同，基本上係一落晒機就即刻上機，好似坐巴士咁。

家住屯門，對自己區總係會有感情。可惜除左已經執左嘅屯門-時代的天空之外，其實真係冇咩地方留住屯門嘅舊樣。難得放假，就襯呢個城市未變晒之前，影番少少相留念。

由開始起 V City 開始，屯門就番天覆地咁翻新，連遠至良景湖碟嘅屋邨商場，都俾領匯整到煥然一新。老店一間一間地執，連鎖店一間一間咁擴張，唔駛好快屯門就會同九龍冇咩分別。

一年前，香港發生過回歸後最嚴重嘅海難。

一年後，除左無咗煙花表演，其他野都如平常一樣。

入左隊咁耐，真係冇諗過香港會發生呢 D 事。當時當緊煙生更，有人係 Whatsapp 到講南丫島附近有舢舨撞船，跌左百幾人落海。當時仲諗住件事係虛構居多，舢舨點會坐到百幾人呀，香港又唔係第三世界…

之後睇落都好似歌舞昇平，煙花照放，電視照播，好似咩事都冇。個時真係唔信，不過好奇令我不時都 refresh 下各新聞網站，但係咩野都搵唔到。

煙花完左之後，終於有即時新聞見到係咩事故。一見到幅相就心感不妙，成架船已經沉左落去，好多黑影 (人？) 係海上面漂浮。書上面學嘅災難，真係發生左。

之後電台嘅氣氛開始緊張，隊員一批批咁俾人揀去海怡，幫手接消防救左上岸嘅傷者。雖然好彩最後未被選中，不過聽其他隊友的憶述，當時環境真係非常震撼，恐慌、失去知覺嘅大有人在。

眨下眼就一年，除左坐船多左段錄音，同埋今年冇左煙花之外，其他野都一如以往了。

有家庭有高達冇肉食的新聞，近來鬧得熱烘烘。估唔到一單普通不過，一年總會炒起幾次的貧窮問題，可以成為社會的焦點。

當然，也許佢地屋企真係未到大家心目中的貧窮，也許香港好多好多人家庭環境都比佢地辛苦，也許社會有好多比佢地有需要的人士…不過，當佢地有願望，當佢地想改善生活的時候，其實佢地都冇錯。正如當年話有六千蚊入強積金，大家都好想財爺真係派錢啦！

我諗大部分人俾人問到想唔想有多啲錢改善下生活，都會諗都唔諗就話想啦，所以真係冇必要為左佢屋企有高達，就走去批鬥佢地。始終人只係一個人，總會有少少貪心嘅。